DV - Frjáls og óháður miðill

Eyjan

Þingflokksformaður Samfylkingarinnar ósáttur við þaulsætni Rósu í stjórnum og nefndum – „Algjör hagsmunaárekstur og trúnaðarbrestur“

Eyjan
Þriðjudaginn 18. mars 2025 12:09

Guðmundur Ari Sigurjónsson, þingflokksformaður Samfylkingarinnar, er allt annað en sáttur með þá fyrirætlun Rósu Guðbjartsdóttur, þingmanns Sjálfstæðisflokksins og fyrrverandi bæjarstjóra Hafnafjarðar, að sitja áfram í stjórn Sambands íslenskra sveitarfélaga eftir landsþing sambandsins sem fer fram á fimmtudag. RÚV greindi frá fyrir stundu en í fréttinni tók Rósa fram að þessar fyrirætlanir gætu þó breyst á breyst á næstu vikum og mánuðum.

Rósa lét af störfum sem bæjarstjóri Hafnarfjarðar um áramót og tók þá við embætti sem formaður bæjarráðs. Fyrir það hafði hún náð kjöri á Alþingi sem þingmaður Sjálfstæðisflokksins.

Nokkra athygli hefur vakið hvað Rósa er þaulsætin í störfum sínum fyrir Hafnarfjarðarbæ í ljósi þingsetunnar en auk þess að vera formaður bæjarráðs þá situr hún sem aðalfulltrúi í Almannavarnarnefnd höfuðborgarsvæðisins, aðalfulltrúi í Stefnuráði byggðasamlaga, varamaður í stjórn Slökkviliðs höfuðborgarsvæðisins og aðalmaður í Fulltrúaráði samtaka sveitarfélaga á höfuðborgarsvæðinu, sem allt eru launuð störf.

Guðmundur Ari Sigurjónsson, þingflokksformaður Samfylkingarinnar, segir setu Rósu í stjórn Sambands íslenskra sveitarfélag vera „algjöran hagsmunaárekstur og trúnaðarbrest“.

„Þetta er svo galið. Eitt af megin markmiðum Sambands íslenskra sveitarfélaga felst í hagmunagæslu sveitarfélaganna gagnvart ríkisvaldinu. Sambandið mótar stefnu sveitarfélaganna og hefur svo náin samskipti við Alþingi. Það að þingmaður sitji í stjórn sambandsins er algjör hagsmunaárekstur og trúnaðarbrestur við sveitarfélögin í landinu. Þessi ákvörðun Rósu setur alla stjórnina í skrýtna stöðu þar sem þau trúnaðarsamtöl sem fram fara í stjórn Sambandsins fara nú fram með fulltrúa Alþingis á fundunum. Formaður og stjórn Sambandsins þurfa að geta ráðið ráðum sínum og átt í trúnaðarsamskiptum um samskipti við m.a. ríkisstjórnina án þess að þurfa að gæta að því fulltrúar þingsins séu viðstaddir,“ skrifar Guðmundur Ari.

Sakar hann svo Sjálfstæðismenn um hræsni í ljósi þess að þegar Bjarni Jónsson fulltrúi VG í stjórn Sambandsins hafi kjörinn á þing þá hafi fulltrúar Sjálfstæðismanna hneykslast mikið á því að Bjarni sagði sig ekki strax úr sömu stjórn.

„Ég skil það vel enda sat ég sjálfur í stjórn Sambandsins þegar ég var kjörinn á þing og sagði mig strax úr stjórninni. Ég sagði mig líka úr bæjarstjórn því fyrir mér er þingmannastarfið fullt starf og ég treysti vel öðrum öflugum fulltrúum Samfylkingar til að taka sæti í bæjarstjórn Seltjarnarnes og stjórn Sambands íslenskra sveitarfélaga. Ég ætla að leyfa öðrum að ræða um launatölur og hvaða mánaðarlaun einstaklingur hefur af skattgreiðendum sem situr á Alþingi, bæjarstjórn Hafnarfjarðar, nefndum á vegum Hafnarfjarðar og stjórn Sambands íslenskra sveitarfélaga. En það sem ég skil ekki er að Hafnfirðingar og Sjálfstæðismenn sætti sig við að kjörinn fulltrúi á þeirra vegum dreifi kröftum sínum á þennan hátt og neiti að hleypa öðrum Sjálfstæðismönnum að trúnaðarstörfum. Hvernig getur einstaklingur í fullu starfi á Alþingi mætt á sama tíma á bæjarstjórnarfundi, nefndarfundi og fundi í stjórn Sambandsins?“ spyr Guðmundur Ari.

Facebook

Twitter

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.