Svandís Svavarsdóttir greinir frá því á Facebook-síðu sinni að á morgun muni hún snúa aftur úr veikindaleyfi og taka til starfa á ný sem matvælaráðherra. Eins og kunnugt er greindist Svandís nýlega með brjóstakrabbamein en í færslunni segir hún að horfurnar séu góðar. Svandís skrifar:

„Kæru vinir, ég vona að þið hafið notið páskahátíðarinnar. Ég kem aftur til starfa á morgun að loknu veikindaleyfi. Meðferðin hefur gengið afbragðs vel, horfur góðar og mér líður vel. Framundan er eftirlit og eftirfylgni, bjartsýni og fullvissa um bjartari tíð. Ég er þakklát fyrir allar kveðjurnar, hlýjuna og góðar óskir og hlakka til verkefnanna framundan!“

Áður en Svandís fór í veikindaleyfið hafði Inga Sæland, formaður Flokks fólksins, lagt fram vantrauststillögu á hana. Tillagan var lögð fram einkum vegna þeirrar niðurstöðu Umboðsmanns Alþingis að tímabundið bann sem Svandís setti við hvalveiðum hafi ekki verið í samræmi við lög.

Inga dró tillöguna til baka þegar Svandís fór í veikindaleyfið en boðaði að hún yrði lögð fram aftur þegar Svandís myndi snúa á ný til starfa. Líklega má því búast við að tillagan verði lögð fram á ný þegar Alþingi kemur saman eftir páskaleyfi 8. apríl næstkomandi.