Guðni Th. Jóhannesson mun sem kunnugt er láta af embætti eftir átta ár sem forseti og verður því kosið um nýjan forseta í sumar. Nokkrir hafa þegar boðið sig fram, ýmsir hafa verið orðaðir við framboð og er Katrín í þeim hópi. Hún hefur ekki útilokað forsetaframboð en sagði í viðtali við mbl.is á nýársdag:
„Ég er bara í mínu starfi á mínum stað og brenn fyrir því og hef ekki hugsað mér til neins hreyfings.“
Í pistli sínum segir Björn Ingi að í nánasta ráðgjafahópi Katrínar sé verið að vega og meta stöðuna.
„Þrátt fyrir erfiðleika ríkisstjórnarinnar undanfarin misseri og hratt minnkandi vinsældir stjórnarflokkana, þar með talið Vinstri grænna, er enn talið að Katrín muni njóta mikils fylgis í forsetakosningum þar sem hún höfðar til miklu stærri hóps en kjósenda Vinstri grænna. Og það er óumdeilt, að Katrín Jakobsdóttir nýtur mikillar virðingar á þingi, þvert á flokka. Hún þykir einfaldlega mjög heilsteypt og góð manneskja,“ segir Björn Ingi og bætir við að margir telji hana hafa sýnt leiðtogahæfileika sína með því að halda enn saman ríkisstjórn í þeim mikla öldusjó sem einkennt hefur samstarfið undanfarin misseri.
Björn Ingi segir að staða Katrínar sé svo sterk að aðrir mögulegir frambjóðendur vilji bíða og sjá hvort hún býður sig fram. Þeir séu með „þreifara“ úti til að spyrjast fyrir um möguleika á framboði hennar.
„Í þeim hópi eru stórkanónur á borð við Jón Gnarr leikara og fv. borgarstjóra, Ólaf Jóhann Ólafsson, rithöfund og fv. forstjóra hjá Sony, og Höllu Tómasdóttur, frumkvöðul og fv. forsetaframbjóðanda. Ekkert þeirra vill bjóða sig fram meðan líkur eru til þess að forsætisráðherrann taki slaginn, sem er til marks um stöðu hennar,“ segir Björn Ingi.
Pistilinn má lesa í heild sinni hér.
