Sigurjón Þórðarson, fyrrverandi þingmaður, verður oddviti Flokks fólksins í Norðausturkjördæmi. Í gær var greint frá því að Jakob Frímann Magnússon hefði misst oddvitasæti sitt í kjördæminu.

Frá þessu er greint í Vikublaðinu.

Sigurjón Þórðarson sat á Alþingi fyrir Frjálslynda flokkinn árin 2003 til 2007, en þá í Norðvesturkjördæmi, en Sigurjón er Skagfirðingur. Sigurjón hefur verið varaþingmaður fyrir Flokk fólksins í Norðvesturkjördæmi á liðnu kjörtímabili.

Sigurjón er líffræðingur og  framkvæmdastjóri heilbrigðiseftirlits Norðurlands vestra. Hann hefur einnig verið goði hjá Ásatrúarfélaginu.