„Nú horfi ég út um stofugluggann á sumarið í iðjuleysi mínu, sem minnir á sumrin þegar ég var barn og unglingur og vísindamenn sögðu mér að nú væri litla ísöldin komin þrátt fyrir mikla aukningu á koltvísýringi í andrúmsloftinu af mannavöldum,“
segir Brynjar í færslu á Facebook, en hugleiðingar hans þar vekja jafnan kátínu og umræðu vina hans á samfélagsmiðlinum. Hann segir það kvíðavaldandi fyrir konuna að hafa hann heima allan daginn:
„Þótt Soffía þjáist af loftslagskvíða er hann smámál miðað við kvíðann að hafa mig heima alla daga. Hún sendir mig gjarnan út í búð til að kaupa einn hlut í einu þannig að ég þurfi að fara 10-20 sinnum í búðina á hverjum degi. Hún hefur lagt til að ég gangi hringinn í kringum landið, eins og Reynir Pétur forðum daga, og safni áheitum fyrir sjálfan mig. Ég þurfi hins vegar að læra að vera jákvæður eins og hann.“
Konan vill helst að Brynjar fari aftur að vinna, en hann er orðinn 63 ára og gæti því átt nokkur góð ár eftir.
„Þá vill Soffía að ég fari að vinna og spurði hvort ég gæti bara ekki opnað lögmannstofuna aftur. Og af því að ég væri svo athyglissjúkur gæti ég rekið málin mín í fjölmiðlum eins og stjörnulögmennirnir gera. En hún benti mér á að það þýddi lítið fyrir mig að fara að kenna í háskólunum aftur. Nemendur í dag vilja ekki láta græta sig alla daga.“
