Cristiano Ronaldo hefur viðurkennt að hann sé hættur að hafa yfirsýn yfir bílasafnið sitt eftir að hafa bætt við það nýjum Bugatti Tourbillon sem kostar um 3,2 milljónir punda. Með bílnum hækkar verðmæti safnsins í um 22 milljónir punda.
Ronaldo, 40 ára, var nýverið útnefndur fyrsti fótboltamaður heims til að verða milljarðamæringur.
Í viðtali við Piers Morgan játaði hann að hann viti ekki lengur nákvæmlega hversu marga bíla hann á.
„Hreinskilnislega, ég hef týnt tölunni. Ef ég þyrfti að giska myndi ég segja 40 eða 41. Ég elska Bugatti, þeir eru sérstakir,“ sagði hann.
Nýi Bugattinn er sagður fjárfesting, þó Ronaldo þurfi varla að hafa áhyggjur af bensínkostnaði.
Hann á fyrir fleiri lúxusbílum eins og Bugatti Chiron (2 milljónir punda), Veyron (1,5 milljónir), Ferrari Daytona SP3 (2 milljónir) og McLaren Senna (750 þúsund pund).
Portúgalinn hefur verið bílaáhugamaður frá því hann gekk til liðs við Manchester United sem ungstirni, þegar hann keypti sinn fyrsta dýra bíl, Porsche Cayenne. Í dag fyllir safnið hans heila sérsmíðaða bílskúra í Sádi-Arabíu.
Þrátt fyrir safnið segir Ronaldo að hann keyri sjaldan í Riyadh vegna mikillar umferðar. Hann staðfesti einnig að allir leikmenn Al-Nassr hafi fengið BMW í gegnum styrktarsamning félagsins.
