Breiðhyltingar segja farir sínar ekki sléttar eftir að tillögu Sjálfstæðismanna um úrbætur í Fálkabakka í Breiðholti var hafnað. Tillagan var lögð fram í umhverfis- og skipulagsráði Reykjavíkur þann 25. janúar síðastliðinn af fulltrúum Sjálfstæðisflokksins.
Í tillögunni var bent á að bifreiðar og strætisvagnar hefðu ítrekað lent í vandræðum í brekkunni vegna mikillar hálku í vetur.
„Um er að ræða þekkt og langvinnt vandamál en við slæmar aðstæður getur alvarleg hætta skapast í hálli brekkunni. Lagt er til að málið verði skoðað í samráði við Strætó bs. og viðeigandi úrbætur gerðar. Í því skyni að auka umferðaröryggi verði skoðaður sá kostur að hita upp götuna þar sem brattinn er mestur. Einnig verði skoðað að hafa þá strætisvagna á nagladekkjum, sem aka Fálkabakka í vetrarfærð,“ sagði í tillögunni.
Tillagan var tekin til afgreiðslu á fundi ráðsins þann 19. apríl síðastliðinn eftir að hafa verið frestað síðan í janúar. Skemmst er frá því að segja að hún var felld með fjórum atkvæðum meirihlutans. Fulltrúar Sjálfstæðisflokksins greiddu atkvæði með tillögunni en fulltrúi VG sátu hjá.
Sjálfstæðisflokkurinn lagði fram bókun vegna málsins þar sem fram kom að fulltrúar flokksins hörmuðu að Samfylking, Framsóknarflokkur, Píratar og Viðreisn kjósi að fella tillögu sem miðar að því að auka umferðaröryggi.
„Um er að ræða þekkt vandamál sem oft hefur verið bent á af strætisvagnastjórum sem og Breiðhyltingum. Við slæmar aðstæður getur alvarleg hætta skapast í hálli brekkunni og gerðist slíkt oftar en einu sinni í janúar síðastliðnum.“
Í umsögn Guðbjargar Lilju Erlendsdóttur, samgöngustjóra borgarinnar, við tillöguna kom fram að þrátt fyrir að hálka geti myndast í Fálkabakka séu aðstæður þar ekki svo slæmar að leggja ætti sérstaka áherslu á þann stað umfram aðra staði.
„Lögð hefur verið áhersla á, bæði af Strætó og Reykjavíkurborg, að vetrarþjónusta á strætóleiðum sé í forgangi með það að leiðarljósi að Strætó nái að aka sínar leiðir greiðlega og örugglega,“ sagði enn fremur í umsögninni.
Kjartan Magnússon, borgarfulltrúi Sjálfstæðisflokksins, gerði grein fyrir niðurstöðu meirihluta umhverfis- og skipulagsráðs í málinu í íbúahópi Breiðhyltinga á Facebook. Ef marka má athugasemdir þar eru íbúar sárir og svekktir.
„Löngu tímabært að laga þessa brekku. Stórhættuleg slysagildra að vetri til,“ sagði í einni athugasemd.
Í annarri sagði:
„Meirihlutinn í Reykjavík hefur síðustu ár þrengt að einkabílnum m.a. undir þeim formerkjum að auka umferðaröryggi. Hvernig stendur á því að þegar raunverulegur öryggisvandi sem fagmenn hafa bent á er til staðar, að þá ákveður meirihlutinn að skilja Breiðholt eftir?“
Enn annar sagði:
„Leitt að heyra en ekki nýtt að meirihlutinn felli tillögur minnihlutans, stundum á maður ekki orð eins og í þessu tilfelli! Þetta er slysagildra sem á ekki að hundsa, má ekki taka þetta mál upp aftur í haust?“
