Sigurður Jónsson, fyrrverandi bæjarstjóri í Garði, hjólar rækilega í Pírata, Viðreisn og Samfylkinguna í pistli sínum sem birtist í Morgunblaðinu í dag undir yfirskriftinni: „Hræsni systurflokkanna.“
Það fyrsta sem Sigurður furðar sig á er að „hinir lýðræðissinnuðu þingmenn Pírata“ hafi haldið uppi málþófi á Alþingi til að koma í veg fyrir að útlendingafrumvarp Jóns Gunnarssonar dómsmálaráðherra fengi afgreiðslu. Þingmenn Pírata höfnuðu því þó að hafa verið að stunda málþóf.
„Þetta gerði flokkurinn sem er svo gagnrýninn á aðra og það þrátt fyrir að vitað væri að frumvarp dómsmálaráðherra nyti stuðnings meirihluta þingmanna. Væntanlega hefðu þó systurflokkarnir Samfylkingin og Viðreisn stutt Pírata í sinni vitleysu,“ segir Sigurður í pistlinum.
Þá talar Sigurður um að þessir flokkar hafi haldið uppi mikilli gagnrýni á það að hælisleitendur sem ekki fái hæli hér á landi séu sendir til Grikklands. „Þar bíði þeirra ekkert annað en gatan. Það sé ömurlegt. Vissulega slæmt ef satt er. Nú fullyrða margir að svo sé ekki. Þetta fólk fái vernd og húsnæði í Grikklandi. Birgir Þórarinsson þingmaður fór til Grikklands að kynna sér málin. Hann fullyrðir að hælisleitendur fái húsnæði í Grikklandi og þjónustu,“ segir hann.
„Er þetta ekki ansi mikill tvískinnungur?“
Það sem vekur athygli Sigurðar er að þeir stjórnmálaflokkar sem gagnrýna hvað mest það að fólk sé sent á götuna til Grikklands séu þeir sömu og eru í meirihlutanum í borgarstjórn.
„Fram hefur komið að nokkur hundruð Íslendingar hafa ekkert húsnæði til að búa í. Hvað bíður þessa fólks? Jú, einhverjir geta fengið húsaskjól yfir blánóttina hjá borginni en út á götuna skuluð þið fara klukkan tíu um morguninn og ekki koma inn fyrr en um kvöldið! Smá undantekning gerð yfir jólin vegna mikils kulda. En hvað svo?
Hvers vegna finnst fulltrúum Pírata, Viðreisnar og Samfylkingar í lagi að húsnæðislausir Íslendingar séu settir á götuna? Er þetta ekki ansi mikill tvískinnungur?“
Annað sem Sigurður gagnrýnir er það að meirihlutanum í Reykjavík datt í hug að leggja niður þjónustu fyrir fólk með geðraskanir. Líklega er Sigurður að tala um úrræðið Vin en í desember fullyrti Reykjavíkurborg þó í tilkynningu að lífsgæði þess hóps sem sækir Vin verði ekki skert.
Engu að síður segir Sigurður að um „furðulega forgangsröðun sé að ræða hjá flokkum „sem kenna sig við félagslega umhyggju viðhafa.“
„Furðuleg skilaboð til fjölskyldna“
Undir lokin hjólar Sigurður svo í nýjan formann Samfylkingarinnar, Kristrúnu Frostadóttur. „Nýr formaður Samfylkingarinnar boðar að sérstaklega skuli gætt að því að hugsa um fjárhagslega hagsmuni fjölskyldufólks. Falleg hugsun. En er það reyndin þar sem Samfylkingin fer með stjórn mála?“ spyr hann og gerir svo tilraun til að svara spurningunni sjálfur.
Sigurður bendir á að fasteignamat hefur hækkað mikið á íbúðarhúsnæði á flestum stöðum landsins. „Flest hinna stóru sveitarfélaga ákváðu að lækka álagningarprósentu til að láta ekki allan þungann bitna á fjölskyldufólki. Eitt sveitarfélag sker sig þó úr,“ segir hann.
„Það er Reykjavík. Þar hækkar fasteignaskattur um 20%. Engin lækkun á álagningarprósentu kemur til greina. Þetta eru furðuleg skilaboð til fjölskyldna og ekki í neinu samræmi við það sem Samfylkingin boðar. Og auðvitað samþykkja Viðreisn og Píratar. Að sjálfsögðu blessar svo Einar og Framsóknarflokkurinn allt saman þótt hann hafi sagst vilja breytingar.“
Sigurður segir að þrátt fyrir að Kristrún boði nýjar áherslur með betri tíð fyrir fjölskyldufólk þá sýni reynslan annað. „Samanber það sem að ofan er ritað,“ segir hann.
„Til viðbótar á svo samfylkingarfólk að hætta að hugsa um það sem aðkallandi vandamál að fá nýja stjórnarskrá eða að tala um að ganga í ESB. Til að undirstrika þetta og stimpla rækilega fær flokkurinn nýtt nafn og nýtt merki. Það verður forvitnilegt að vita hvort nýjum formanni tekst að breyta hugsun gamalreyndra þingmanna eins og Loga, Oddnýjar og Helgu Völu, sem vart hafa getað talað um annað en nýja stjórnarskrá og ESB.“
