Óhætt er að segja að allt logi hjá Flokki fólksins á Akureyri eftir að þrjár konur, úr forystu flokksins í bænum, stigu fram og báru þá Jón Hjaltason og Brynjólf Ingvarsson, flokksbræður sína, alvarlegum sökum. Einnig komu fram ásakanir á hendur Hjörleifi Hallgríms Herbertssyni, fyrrverandi ritstjóra Vikudags á Akureyri og kosningastjóra flokksins.

Konurnar þrjár, Málfríður Þórðardóttir, Tinna Guðmundsdóttir og Hannesína Scheving, boðuðu til blaðamannafundar í gær til að skýra frá upplifun sinni og líðan síðustu mánuði. Á fundinum sögðu þær að Hjörleifur hefði margoft áreitt þær kynferðislega.

„Þetta er tóm lygi, þessar konur eru svikakvendi, en aftur á móti hef ég haft í flimtingum oftar en einu sinni að ég hafi aldrei tekið á konu nema undir sæng við eðlilegar aðstæður. En það er helber lygi að ég hafi beitt þær ofbeldi,“ sagði Hjörleifur í samtali við Fréttablaðið í gærkvöldi.

Á fundinum sögðu þær að enn frekari trúnaðarbrestur hefði orðið þegar þær ræddu samskiptin og afleiðingar þeirra við Jón og Brynjólf. Jón hefði öskrað og látið skap sitt bitna á húsgögnum.

Þær sögðu að Hjörleifur hefði margoft reynt að fá eina þeirra til að verja kvöldstund með honum. Þegar hún hafi bent honum á að hún eigi lítið barn hafi hann sagt að hún gæti tekið barnið með.

Nánar er hægt að lesa um málið í Fréttablaðinu í dag.