Gunnar Smári Egilsson, formaður framkvæmdaráðs Sósíalistaflokksins, segir Jón Gunnarsson, dómsmálaráðherra, og Sjálfstæðisflokksins vera að „glæpavæða flóttafólk.“ Þessi orð lét Gunnar Smári falla í Silfrinu á RÚV þar sem hann var gestur ásamt Bryndísi Haraldsdóttur, þingmanni Sjálfstæðisflokksins, Þorbjörgu Sigríði Gunnlaugsdóttur, þingmanni Viðreisnar og Birni Inga Hrafnssyni, fjölmiðlamanni. Þar var umræða um flóttafólk áberandi og ekki síst varðandi nýtt útlendingafrumvarp dómsmálaráðherra,

Gunnar Smári gagnrýndi að umræðan um flóttafólk snúist um fólk frá Albaníu sem komi hingað á fölsuðum skilríkjum en það sé aðeins sáralítil hluti, að hans sögn, af þeim fjölda flóttafólks sem til Íslands kemur til landsins. Grunnkerfi landsins séu að springa útaf áralangri vanrækslu og fordæmdi Gunnar Smári að sú staðreynd væri sett í samhengi við fjölgun flóttafólks.

Bendir Gunnar Smári á vandinn sé sá að ríkisstjórnin hafi boðið flóttamönnum frá Venesúela að koma til Íslands, eins og flóttamönnum frá Úkraínu, en 75% allra þeirra sem sækja um hæli hérlendis séu frá þessum tveimur löndum.

„Vandamálið sem við stöndum frammi fyrir og flóttafólkið er það að ríkisstjórnin bauð fólki frá Úkraínu og Venesúela að koma hingað en gerði ekkert til þess. Þau eru eins og fólk sem að býður í fólki í mat en það er ekki eldað og ekki einu sinni keypt í matinn. Þar af leiðandi er gríðarlegt álag á grunnkerfin en það er ekki þessum þremur með fölsuð skilríki frá Albaníu að kenna,“ segir Gunnar Smári.

Hann segir umræðuna algjörlega siðlausa og að hún byggi á tilfinningum til þess að ala á andúð á útlendingum.

Bryndís Haraldsdóttir greip þá til varna og sagði að það væri akkúrat málflutningur eins og þessi væri vondur. „Þessi orðræða hér að það sé verið að ala á einhverjum ótta. Það er miklu frekar þetta ágæta flóttafólk sem við þurfum að vernda. Það eru glæpamenn sem eru að misnota neyð þessa fólks. Það er með því ekki verið að segja að flóttamennirnir sjálfir séu glæpamenn,“ sagði Bryndís.