Þetta eru niðurstöður nýlegrar rannsóknar. Sky News skýrir frá þessu. Fram kemur að niðurstöður rannsóknarinnar sýni að Brexit hafi valdið hærri framfærslukostnaði í Bretlandi, dregið úr fjárfestingum og að Bretar hafi glatað mikilvægum mörkuðum.
Það var the Resolution Foundation sem gerði rannsóknina í samvinnu við the London School of Economics. Niðurstöður hennar sýna að Brexit hefur dregið úr samkeppnishæfni Bretlands og þrengt að efnahagslífinu. Þess utan hefur úrsögnin valdið hærri framfærslukostnaði og dregið úr fjárfestingum.
Nýjar reglur, tengdar Brexit, sem tóku gildi í janúar 2021 drógu ekki eins mikið úr útflutningi til ESB og margir höfðu spáð. Innflutningur frá ESB dróst meira saman en innflutningur frá ríkjum utan sambandsins eftir því sem segir í rannsókninni.
Meðal helstu niðurstaðna er að framleiðni verkafólks mun dragast saman um 1,3% á þessum áratug vegna breytinga á fríverslunarsamningum. Þetta mun hafa í för með sér minni hækkun launa en ella þannig að laun verkafólks verða 470 pundum lægri á ári en ella.
Reiknað er með 30% samdrætti í sjávarútvegi og margir munu missa vinnuna í greininni. Breskur sjávarútvegur er ekki mikill að umsvifum en margir innan greinarinnar börðust fyrir Brexit og töldu úrsögn ávísun á betri tíma í sjávarútvegi.
