Oddvitar borgarstjórnarflokkanna héldu áfram að ræða saman í gær og þreifa fyrir sér um myndun meirihluta. Þeir hittust og ræddu saman í síma. Umræðan snerist um Framsóknarflokkinn og hvort flokkurinn vilji horfa til hægri eða vinstri við myndun meirihluta.

Morgunblaðið skýrir frá þessu í dag. Fram kemur að Hildur Björnsdóttir, oddviti Sjálfstæðisflokksins, hafi átt langan fund með Einari Þorsteinssyni, oddvita Framsóknarflokksins, í gær. Hefur blaðið eftir heimildarmönnum að fundurinn hafi verið árangursríkur hvað varðar að glöggva sig á stöðunni og hugsanlegum samstarfsflötum.

Morgunblaðið segist hafa heimildir fyrir að Hildur hafi fundað með fulltrúum annarra flokka í gær en þó ekki fulltrúum Samfylkingarinnar.

Staðan er galopin í borginni og ekki hægt að útiloka marga kosti enn um sinn nema út frá yfirlýsingum Pírata, Sósíalista og Vinstri grænna. Samfylkingarfólk er sagt segja að samstarf við Sjálfstæðisflokkinn sé langsótt en hafnar því ekki alfarið.

Morgunblaðið segir að innan Samfylkingarinnar séu margir farnir að ókyrrast, meðal annars vegna þess að þeir telji að samningar við Framsóknarflokkinn geti orðið dýrir og erfiðir ef það sé eini kosturinn. Sé því vaxandi þrýstingur á Dag B. Eggertsson, borgarstjóra, um að opna fyrir samræður við Sjálfstæðisflokkinn en Dagur hefur ekki viljað ræða við Hildi fram að þessu.