Drífa Snædal, forseti ASÍ, segir að aldrei í Íslandssögunni hafi stéttarfélag sagt upp öllu sínu starfsfólki á einu bretti, líkt og er að eiga sér stað hjá Eflingu. Ljóst sé að mikil þekking muni tapast og upplausn ríki nú á vinnustaðnum. Hún segir að ASÍ muni taka málið fyrir á sínum vettvangi.

„Ég hélt ekki að ég ætti eftir að upplifa þann dag að stéttarfélag segði upp öllu starfsfólki sínu á einu bretti. Þetta hefur ekki gerst áður hér á landi og mér er til efs að til sambærilegra aðgerða hafi verið gripið nokkurs staðar á Norðurlöndunum eða í öðrum löndum með frjálsa og skipulagða verkalýðshreyfingu. Hópuppsagnir að nauðsynjalausu eru ekkert annað en aðför að réttindum launafólks og ganga gegn því sem verkalýðshreyfingin stendur fyrir: Atvinnu- og afkomuöryggi.“

Drífa segir að félagsmenn Eflingar siti nú uppi með laskað félag.

„Á vinnustaðnum ríkir nú upplausn og alveg ljóst að mikil reynsla og þekking hverfur úr húsi. Þekking á túlkun kjarasamninga, greiðslum úr sjúkrasjóðum, fræðslusjóðum, úthlutun orlofshúsa, ráðgjöf um starfsendurhæfingu, innheimtu vangoldinna launa og allt annað sem stéttarfélög vinna að dags daglega. Félagsfólk Eflingar sem treystir á aðstoð síns stéttarfélags situr uppi með laskað félag.“

Drífa segir að fyrirtæki sem myndu leika þetta eftir yrðu fordæmt og hvetur hún þá stjórnarmenn Eflingar sem samþykkti uppsagnirnar að endurskoða ákvörðun sína.

„Við myndum fordæma öll fyrirtæki sem stæðu fyrir slíkum gjörðum.

Ég hvet þá stjórnarmenn sem samþykktu þessa tillögu að endurskoða ákvörðunina. Alþýðusambandið mun taka málið fyrir á sínum vettvangi.“