Hæstiréttur Íslands tilkynnti nýverið að útlit dóma hans fengi andlitslyftingu. Sagði í tilkynningu æðsta dómstóls landsins að Hæstiréttur hefði, í samstarfi við Kríu hönnunarstofu og Advania, „hannað og útfært nýtt útlit á dómum réttarins.“
Nú þegar hafa nokkrir dómar með „nýja-lúkkinu,“ verið birtir og sjá má samanburðinn hér að neðan.
Í skriflegu svari við fyrirspurn blaðamanns DV segir Þorsteinn A. Jónsson, skrifstofustjóri Hæstaréttar, að kostnaðurinn við breytinguna hafi kostað samtals 977.666 krónur. Kostnaðurinn við hönnun nam 175 þúsundum og forritunarvinnan sem fylgdi hafi kostað 822 þúsund.
Þorsteinn segir jafnframt í svari sínu að breytingin taki mið af framsetningu efnis á netinu og miðar að því að gera efnið aðgengilegra og læsilegra á öllum tækjum. „Hér var einnig höfð hliðsjón af því hvernig staðið er að útliti dóma hjá æðstu dómstólum nágrannalandanna og alþjóðlegum dómstólum. Jafnframt miðaði forritunin að því að gera birtinguna auðveldari,“ segir hann jafnframt.
Flettingar á vef Hæstaréttar eru um 30 þúsund í hverjum mánuði og er hann notaður í daglegum störfum dómstóla, lögmanna, lögfræðinga og laganema um land allt.
Aðrar breytingar á framsetningu dóma má sjá á nýjum dómum dómstólsins. Héðan í frá verða úrlausnir Landsréttar og héraðsdóms aðgengilegar með hnappi beint úr dómi Hæstaréttar í sama máli.