Í gær greindi mennta- og menningarmálaráðuneytið frá því að Lilja Alfreðsdóttir, ráðherra, hefði gefið Kolbeini Óttarssyni Proppé, Silju Dögg Gunnarsdóttur og Páli Magnússyni það verkefni að gera gera tillögur að breytingum á lögum um Ríkisútvarpið. Markmiðið væri að sætta ólík sjónarmið um starfsemi og hlutverk Ríkisútvarpsins.

Athygli vakti að þingmennirnir þrír, sem Lilja valdi, koma úr stjórnarflokkunum þremur, en engin úr stjórnarandstöðu.

Hanna Katrín Friðriksson, þingkona Viðreisnar virtist heldur betur ósátt með þetta í færslu sem birtist á Facebook í gær, en hún spurði hreinlega: „Afsakið en hvaða grín er þetta?“

Hönnu finnst greinilega sérstakt að þrír þingmenn úr stjórnarflokkunum séu fengnir til að sætta ólík sjónarmið. Hún benti á þingmennirnir hefðu einungis rúman mánuð til að sinna verkinu, og telur hún að stjórnarandstöðuþingmenn hafi verið skyldir út undan til að verkið myndi ganga vel fyrir sig á þessum skamma tíma.

Færsla Hönnu var eftirfarandi:

„Afsakið en hvaða grín er þetta?

Menntamálaráðherra felur þremur stjórnarþingmönnum  að athuga hvort endurskilgreina þurfi hlutverk RÚV, öryggishlutverk og og fjármögnun. 

Í leiðinni vill ráðherra fá tillögur að breytingum til að “sætta ólík sjónarmið um starfsemi og hlutverk Ríkisútvarpsins.”

Þremenningarnir fá rúman mánuð til verksins og til að tryggja að það gangi vel fyrir sig eru engir stjórnarandstöðuþingmenn hafðir með í ráðum.“