Sagt var frá því í fréttum í gær að Herði Oddfríðarsyni hefði borist óvænt mótframboð á aðalfundi fulltrúaráðs Samfylkingarinnar. Hörður hefur verið virkur í innra starfi Samfylkingarinnar í mörg ár. Mótframboðið kom frá Ástu Guðrúnu Helgadóttur, fyrrum þingmanns Pírata sem nýverið gekk til liðs við Samfylkinguna. Nú í dag sagði Innherji frá því að aðeins einu atkvæði hefði munað á milli þeirra Harðar og Ástu.

Ásta sat á þingi fyrir Pírata árin 2015 til 2017 en datt af þingi í þar síðustu kosningum. Í desember í fyrra birtist hún á lista yfir áhugasama um að taka sæti á framboðslistum Samfylkingarinnar í Reykjavík. Samfylkingin hafði reyndar lengi verið mátuð við Ástu, en þegar Eiríkur Jónsson fullyrti á vefsíðu sinni að hún væri á leið þangað svaraði hún fullum hálsi: „Þó svo að ég sé í sambúð með manni sem hefur verið formaður Ungra jafnaðarmanna þá held ég að ég haldi mig innan Pírata, í bili allavega. Þetta er algjört bull og það er engin hætta á að ég sé að fara úr Pírötum,“ sagði hún meðal annars við Stundina.

Ásta fór síðar úr Pírötum og í Samfylkinguna.

Samkvæmt upplýsingum Innherja er það mat innanbúðarmanna að þrátt fyrir tap Ástu sé ljóst að óánægja sé með störf ýmissa trúnaðarmanna innan Samfylkingarinnar, og þá helst þeirra sem komu nálægt störfum uppstillingarnefndar fyrir síðustu þingkosningar. Störf uppstillingarnefndarinnar voru harðlega gagnrýnd.

Þá segir jafnframt á Innherja að aðalfundi fulltrúaráðs Samfylkingarinnar í Reykjavík hafi verið frestað til 17. desember, en þá er að vænta loka ákvörðunar um hvernig staðið verði að vali á framboðslista flokksins fyrir borgarstjórnarkosningarnar í Reykjavík.