Það stefnir í að atvinnuleysi verði 5,1% um mánaðamótin en það er um það bil sama hlutfall og var þegar heimsfaraldurinn skall á í febrúar 2020. Það náði hámarki í janúar þegar það mældist 11,6% en síðan þá hefur það lækkað í hverjum mánuði. Í ágúst var það komið í 5,5%.

Fréttablaðið skýrir frá þessu. Haft er eftir Birnu Guðmundsdóttir, deildarstjóra gagnagreiningar hjá Vinnumálastofnun, að þetta sé gríðarlega jákvætt. „Atvinnulífið var um 100 mánuði að jafna sig eftir bankahrunið en þessi atvinnukreppa virðist vera 20 mánuðir. Um fimm sinnum fljótari,“ sagði hún.

Hún sagði spána fyrir veturinn vera bjarta. „Ferðaþjónustan er komin í einhvers konar jafnvægi og jafnvel betra en fyrir faraldurinn. Kannski viljum við ekkert tvær til þrjár milljónir ferðamanna á ári. Fólk hefur færst til milli greina og horfurnar fyrir veturinn eru ekki slæmar. Við fáum ekki slæman vetur eins og í fyrra,“ sagði hún.

Það má þó gera ráð fyrir árstíðabundnum sveiflum og að atvinnuleysið verði mest yfir vetrarmánuðina þegar mesta lægðin er í ferðaþjónustu, byggingariðnaði og sjávarútvegi.