Willum Þór Þórsson oddviti Framsóknar í Suðvesturkjördæmi var gestur í The Snorra Björns PodcastShow á dögunum og kom fram í inngangi þáttarins að þingmaðurinn væri með 99% mætingu á Alþingi.

Mæting þingmanna var reiknuð út frá þátttöku í atkvæðagreiðslum þingsins. Blaðamaður DV skoðaði málið en samkvæmt vef Alþingis greiddi Willum 4.402 atkvæði á kjörtímabilinu af 4.416 sem gerir 99,96%.

Mæting Willums er þannig í nokkrum sérflokki, en hann er til dæmis með betri mætingu en sjálfur Steingrímur J. Sigfússon, Forseti Alþingis sem mætti í 95% atkvæðagreiðslna Alþingis á síðasta kjörtímabili. Sömu sögu var þá að segja af Willum á kjörtímabilinu 2013 til 2016 en þá endaði hann með 98,5% mætingu.

Aðspurður hvað hafi staðið í vegi fyrir 100% mætingu á þessu kjörtímabili segist Willum ekki átta sig á því. ,,Ætli stimpilklukkan hafi ekki bara klikkað því ég var alltaf mættur, en ég þarf ekkert klapp á bakið fyrir að mæta í vinnuna,“ sagði Willum í léttum tón. Í viðtalinu hjá Snorra var Willum einnig spurður út í þessa samviskusemi ,,Ég er alinn upp við samviskusemi, að skila því af mér sem ég er fenginn til og það er bara innbyggt, ég bara finn það og það er gildi sem ég er alinn upp með.“

Þess má þá geta að samkvæmt óformlegri yfirferð blaðamanns er algeng mæting þingmanna í atkvæðagreiðslur á bilinu 70%-90%.