Sigmundur Davíð Gunnlaugsson, formaður Miðflokksins, lagði fram fyrirspurn á Alþingi fyrr í sumar, þar sem hann varpaði fram spurningunni: „Hversu mörg eru kyn mannfólks að mati ráðuneytisins?“ og óskaði eftir skriflegu svari.

Katrín Jakobsdóttir, forsætisráðherra, hefur nú svarað Sigmundi. Hún bendir á lög um kynrænt sjálfræði, sem leyfir fólki að skrá sig sem karl, konu eða kynsegin/annað. Jafnframt bendir hún á að í lögunum séu það kyneinkenni, kyngervi, kynvitund og kyntjáning sem hafi áhirf á það hvað ákvarði kyn, og því segir hún að kyn skilgreinist ekki bara af líffræði.

„Kynin samkvæmt lögum eru ekki lengur tvö, kona og karl, heldur opnar skilgreiningin á hugtakinu í lögum á þann möguleika að kyn séu fleiri.“ segir Katrín, en svar hennar í heild sinni má lesa hér.

Í samtali við DV í sumar hafði Sigmundur opinberað skoðun sína á málinu. Hann sagði að kynin væru einungis tvö, og er þar af leiðandi ekki sammála Katrínu.

„Þetta er ekki spurning um hvað ég tel að þau séu mörg, heldur hvað er náttúruleg staðreynd. Það eru tvö kyn. Ég er karlkyns. Ég þurfti svo sem ekki að skilgreina það sjálfur, það kom fram á fæðingarvottorði mínu,“