Benedikt Jóhannesson, stofnandi Viðreisnar, segir rangt að hann hafi hafnað 2. sæti á lista flokksins. Frá því hefur verið greint í fjölmiðlum í dag að hann hafi hafnað boði um annað sætið en í síðustu viku vakti mikla athygli er Benedikt lýsti því yfir að honum hefði verið boðið neðsta sætið á listanum.

Þorgerður Katrín Gunnarsdóttir, formaður flokksins, heldur því hins vegar fram að Benedikt hafi verið boðið annað sætið. Hann hafi hafnað því. Benedikt segir það alls ekki rétt en hann setti það skilyrði að hann yrði fyrst beðinn afsökunar á þeirri ákvörðun uppstillingarnefndar flokksins að setja hann í neðsta sæti listans. Það var eftir þá uppstillingu sem formaðurinn bauð Benedikt annað sætið. Benedikt fer yfir málið í nýrri færslu á Facebook-síðu sinni. Þar segir hann jafnframt að það hafi verið ákvörðun Þorgerðar en ekki hans að ræða málið opinberlega:

„Formaður Viðreisnar segir á mbl.is að ég hafi hafnað 2. sæti á lista flokksins. Þetta er rangt. Þvert á móti féllst ég á þá beiðni formannsins. Ég taldi aftur á móti eðlilegt og nauðsynlegt að áður yrði gert út um þau leiðindamál sem hófust á ákvörðun uppstillingarnefndar flokksins að bjóða mér neðsta sæti listans.

Þorgerður óskaði eftir því á mánudagsmorgun að ég tæki 2. sæti á lista flokksins í Reykjavík norður. Ég féllst á þá beiðni, en taldi nauðsynlegt að þeir sem hefðu komið fram við mig með óviðurkvæmilegum hætti í þessu máli bæðu mig afsökunar. Ég tók fram að þetta væri einungis til þess að ljúka þessum málum af minni hálfu og leggja grunn að góðu samstarfi. Ég myndi ekki gera þær afsakanir opinberar. Þorgerður svaraði eftir umhugsun að slík persónuleg afsökunarbeiðni væri ekki í boði. Því fór sem fór.

Ég átti ýmis samtöl við formann flokksins, en við vorum sammála um að öll okkar samskipti væru trúnaðarmál. Ástæða þess að ég tala nú um þessi mál er að Þorgerður kýs að ræða þau opinberlega.“