Skæruliðadeild Samherja, sem samanstendur af Þorbirni Þórðarsyni almannatengill, Páli Steingrímssyni skipstjóra og Örnu Bryndísi Baldvins McClure lögmanni, litu á Kristján Þór Júlíusson, sjávarútvegsráðherra, sem sinn mann. Þetta kemur fram í umfjöllun Stundarinnar í dag.
Í þeim samskiptum sem Stundin og Kjarninn hafa undir höndum milli Skæruliðadeildarinnar kemur fram að Páll skipstjóri hafi verið í sambandi við Kristján Þór og leitað hjá honum ráða. Tilefnið var að fyrir mistök hafi Páll fengið póst frá framkvæmdastjóra Geðhjálpar, Grími Atlasyni, þar sem minnt var á tíma hjá ráðgjafa. Pósturinn var ætlaður öðrum manni með svipað nafn.
„Var að tala við Kristján Þór um mailið frá Grím og hann bað mig fyrst að senda þetta á stjórnarformann Geðhjálpar áður en ég gerði nokkuð annað,“ sagði Páll við Örnu í kjölfarið. Páll taldi sig þarna vera kominn með höggstað á Helgu Völu Helgadóttur, þingman Samfylkingarinnar, sem er eiginkona Gríms. En skæruliðadeildin vildi stoppa Helgu Völu sem hafði gagnrýnt Samherja.
Kristján Þór hefur frá desember 2019 lýst sig vanhæfan til að fjalla um það sem snýr beint um Samherja en hefur áfram tekið ákvarðanir varðandi sjávarútveg en þær ákvarðanir tengjast hagsmunum Samherja með beinum hætti. Athygli vakti að í kjölfar þess að Samherjamálið komst í fjölmiðla hringdi Kristján í forstjóra útgerðarinnar, Þorstein Má Baldvinsson, til að „spyrja hvernig honum liði“.
Dæmi um samskipti þar sem Kristjáni bregður fyrir og Stundin greinu frá eru eftirfarandi:
Páll skrifaði „Jebb núna svarar hann ekki skilaboðum frá mér, en Mái spyr hvort ég eigi fleiri vinkonur eins og Ingunni.“
Þá svarar Arna „hahaha. Ingunn er gull“
Með Ingunni er vísað til Ingunnar Björnsdóttir, doktors í lyfjafræði sem gagnrýndi RÚV harðlega fyrir umfjöllun um Seðlabankamálið og Samherjamálið. Kristján Þór lækaði einmitt þá gagnrýni.
Á örðum stað í samskiptum ræddi Skæruliðadeildin um Inga Frey Vilhjálmsson, blaðamann Stundarinnar.
„Hann er að fara í þá sem standa í kringum okkur. Hann hefur farið í Jón Óttar, Þorbjörn, þig, Kristján Þór, börn ÞMB og KV, og nú Ingunni. Hann er að reyna að hræða fólk frá því að tjá sig“. Þetta segir Arna Páli að segja við Ingunni. En þarna sést að Kristján Þór er talinn til þess fólk sem „standi í kringum“ skæruliðadeildina og þar með Samherja.
