Kjartan Sveinn Guðmundsson, framhaldsskólanemi, veltir fyrir sér stöðu lýðræðis á Íslandi í kjölfar ákvörðunar Reykjavíkurborgar að reisa ekki styttu af tónlistarmanninum Kanye West þrátt fyrir yfirburðakosningu í íbúakosningunum Betri Reykjavík.

Hann lýsir óánægju sinni í pistli sem birtist hjá Kjarnanum.

„Eitt það versta við eftirlitssamfélög lögregluríkja og auðvaldsmeistara er hrun lýðræðis. Við sjáum bæði austan- og vestanhafs að þegar lýðræðisleg gildi eru brotin niður kemur í staðinn pláss fyrir egóista sem svífast einskis í nafni gróða og valda. Dæmi um þetta eru hertar reglur gegn mótmælum í Bretlandi, andlát rannsóknarblaðamennsku í Bandaríkjunum og ákvörðun embættismanna Reykjavíkurborgar um að koma í veg fyrir að Kanye West-stytta yrði reist við Vesturbæjarlaug.“

Kjartan segir Kanye West hafa meiri þýðingu fyrir hann en aðrir þekktir Íslendingar sem borgarstjórn hefði ekki hikað við að reisa styttu af.

„Kanye West hefur gert meira fyrir mig en Jónas Hallgrímsson, Káinn, Gunnar Gunnarsson og Snorri Sturluson samanlagt. Efalaust geta einhverjir þeirra 772 aðila sem greiddu atkvæði með styttunni á vefkosningu Reykjavíkurborgar sammælst mér, en þá vaknar spurningin: Hefði styttan verið reist ef við hefðum beðið um eitthvert af fyrrnefndum skáldum í staðinn fyrir hæstvirtan West?“

Telur Kjartan ljóst að það hefði lítið hik veirð á borgarstjórn að reisa styttu af einhverjum ofangreindum Íslending. Ljóst sé að frjálsa valið sem var boðað í Betri Reykjavík hafi verið lygi.

Annað dæmi um hvernig almenningur og álit þeirra sé hunsað sé stjórnarskrármálið sem ríkisstjórnin hafi sópað undir teppið.

„Allt sem þú lest er lygi, söng Maus. Nú fer að styttast í óöld kosningaloforða og Facebook-myndbandafalsfrétta með tilheyrandi umræðum um stjórnarskrá og borgaralýðræði, pottþétt gagnsæi í ríkisrekstri líka. Ég vil bara segja að ef einhver flokkur vill vera tekinn alvarlega af mér þarf hann að lofa niðurrifi styttu Jóns Sigurðssonar á Austurvelli og í stað hans kæmi gullhúðaður Kanye fyrir framan Alþingi. Íhaldið sem er á móti því má leggja til Drake-styttu í staðinn.“