Í dag hefst utankjörfundaratkvæðagreiðsla vegna forsetakosninganna, sem fara fram 27. júní, hjá sýslumönnum um land allt. Á höfuðborgarsvæðinu fer atkvæðagreiðslan fram á fyrstu hæð Smáralindar. Opið verður alla daga frá 10 til 19 nema hvað lokað verður á hvítasunnudag og annan dag hvítasunnu.

Frá 15. júní verður einnig hægt að kjósa á Laugardalsvelli á milli klukkan 10 og 22 alla daga en lokað verður á þjóðhátíðardaginn 17. júní. Á sjálfum kjördeginum verður aðeins hægt að kjósa utankjörfundar í Smáralind á milli klukkan 10 og 17 og eru það aðeins kjósendur á kjörskrá utan höfuðborgarsvæðisins sem það geta gert.

Erlendis verður hægt að kjósa í sendiráðum, aðalræðisskrifstofum og hjá kjörræðismönnum. Á vef utanríkisráðuneytisins er athygli vakin á að ráðlegt geti verið að panta tíma vegna margvíslegra takmarkana sem eru í gildi vegna heimsfaraldurs kórónuveiru.

Í framboði eru Guðni Th. Jóhannesson, forseti, og Guðmundur Franklín Jónsson, hagfræðingur.

Á vef Stjórnarráðsins er hægt að finna nauðsynlegar upplýsingar um kosningarnar.