Starfsemi Icelandair og innanlandsflugs Air Iceland Connect verður sameinuð samkvæmt tilkynningu frá Icelandair Group. Sameina á flugrekstrarsvið, markaðsmál, mannauðsmál, fjármálasvið og upplýsingatækni.
Framkvæmdastjóri Air Iceland Connect, Árni Gunnarsson mun láta af störfum og taka við framkvæmdastjórastöðu Iceland Travel, en staða Árna verður lögð niður í kjölfarið. Iceland Travel er félag innan Icelandair Group og mun Björn Víglundsson, núverandi framkvæmdastjóri Iceland Travel, hverfa til annarra starfa eftir að samþættingarvinnu lýkur.
Félögin tvö munu áfram starfrækja tvö aðskilin flugrekstrarleyfi og áhafnir hjá Air Iceland Connect verða starfsmenn þess félags áfram.
„Í því ástandi sem nú ríkir erum við að leita allra leiða til hagræðingar í rekstri Icelandair Group og teljum við mikil tækifæri í því að samþætta flugrekstur okkar enn frekar,“
segir Bogi Nils Bogason forstjóri Icelandair í tilkynningu.
