Ágúst Ólafur Ágústsson, þingmaður Samfylkingarinnar, segir að Katrín Jakobsdóttir forsætisráðherra fari ekki eftir eigin orðum varðandi samstöðuna sem hún hafi boðað í kjölfar Covid-19.

Ágúst skrifar í gærkvöldi:

„Mikið getur pólitíkin stundum verið fyrirsjáanleg. Núna í skugga heimsfaraldurs hefði maður haldið að ríkistjórnarflokkarnir gætu risið upp úr pólitískum skotgröfum. Rétt áðan gekk þingheimur til atkvæða um efnahagslegar aðgerðir vegna kóróna-faraldurs. Samfylkingin studdi allar tillögur ríkisstjórnarinnar en viti menn, hver einasti þingmaður VG, Framsóknar og Sjálfstæðisflokksins, kaus gegn öllum tillögum sem við komum með frá stjórnarandstöðunni (sem 47% af þjóðinni kaus síðast).“

Ágúst minnir á orð forsætisráðherra um samstöðu, sem hann telur að virki bara í aðra áttina þegar kemur að Katrínu og ríkisstjórninni:

„Merkilegt hvað sumum finnst samstarf og samvinna eigi í raun bara að virka í aðra átt. Forsætisráðherra hefur ítrekað talað um mikilvægi þess að stjórnmálaflokkar sýni samstöðu, ekki síst á þessum tímum. Hvernig væri að hún byrjaði á sínum flokki og sinni ríkistjórn?“

 

Aðgerðarpakki ríkisstjórnarinnar var samþykktur í gærkvöldi í sex þingmálum upp á tæpa 26 milljarða króna, en allar breytingatillögur frá stjórnarandstöðunni voru felldar. Aukningin frá fyrstu umræðu er um 4.6 milljarðar, en stærsta málið var hinn svokallaði bandormur sem nær til ýmissa efnahagslegra aðgerða vegna áhrifa kórónaveirunnar.

Sameiginlegar tillögur stjórnarandstöðunnar voru upp á 30 milljarða.