Greiðsluþátttaka Sjúkratrygginga ríkisins í tannlækningum aldraðra og öryrkja eykst um sjö prósent frá 1. janúar 2021, úr 50% í 57%. Þetta kemur fram í frétt á vef stjórnarráðs.

Er þetta liður í áætlun heilbrigðisráðherra um að lækka greiðsluþátttöku sjúklinga vítt og breitt um kerfið. Áætlaður kostnaður ríkisins vegna þessarar tilteknu aðgerðar nemur 200 milljónum króna. Stefnt er að því að greiðsluþátttaka sjúkratrygginga vegna tannlækniskostnaðar þessara hópa verði komin í 75% árið 2024. Til að ná því markmiði er í gildandi fjármálaáætlun gert ráð fyrir að framlög hins opinbera verði aukin um 200 milljónir króna á næstu fjórum árum.

Komugjöld í heilsugæslu lækka úr 700 krónum í 500 krónur um áramótin. Þá verður einnig fellt niður sérstakt komugjald hjá þeim sem sækja aðra heilsugæslustöð en þeir eru skráðir hjá. Um áramótin tekur heilsugæslan um allt land við skimunum fyrir krabbameini í leghálsi og lækkar þá gjald fyrir leghálsstrok úr 4.818 krónum í 500 krónur.

Svandís Svavarsdóttir heilbrigðisráðherra segir um þetta: „Hér eru stigin mikilvægt skref til þess að lækka greiðsluþátttöku sjúklinga fyrir heilbrigðisþjónustu sem er afgerandi þáttur í því að jafna aðgengi fólks að heilbrigðisþjónustu og sporna við heilsufarslegum ójöfnuði af félagslegum og fjárhagslegum ástæðum.“