„Hvað gerir varaformaður í stjórnmálaflokki? Ég er ekki svo viss um að þetta sé að öll leyti nauðsynlegt embætti,“ sagði Ólafur Ísleifsson, þingmaður Miðflokksins, er Fanney Birna Jónsdóttir spurði hann í þættinum Silfrið hvers vegna samþykkt hefði verið á aukalandsþingi flokksins að leggja niður embætti varaformanns.

Þingflokksformaður fer með skyldur varaformanns eftir breytingarnar en skipuð verður fimm barna yfirstjórn flokksins sem sæti eiga í formaður, þingflokksformaður og þrír meðstjórnendur.

Fanney spurði Ólaf hvort hann skildi þær raddir sem telja að breytingunum sé beint gegn Vigdísi Hauksdóttur, borgarfulltrúa flokksins, en hún hafði lýst yfir framboði til varaformanns fyrir löngu.

Ólafur sagði svo ekki vera enda hefðu þessar breytingar verið lengi í smíðum. „Markmiðið er að tengjast flokksmönnum betur. Við erum ekki uppnæm fyrir silkihúfum. Við setjum einbeitingu á málefnastarf, almannatengsl og fjármál, ég lít bara þannig á að verið sé að straumlínulaga yfirstjórnina og tengja hana betur við almenna flokksmenn.“

Í hinum frægu hljóðritunum af samræðum þingmanna á Klaustur Bar haustið 2018 voru raddir sem sögðu að Ólafur yrði kjörinn þingflokksformaður Miðflokksins ef hann gengi í flokkinn úr Flokki fólksins. Sigmundur Davíð Gunnlaugsson, formaður flokksins, þvertók fyrir að hafa heitið Ólafi því embætti. Gunnar Bragi Sveinsson gegnir í dag embætti varaformanns og þingflokksformanns hjá Miðflokknum, en varaformannsembætti verður nú lagt niður.

Á aukalandsþinginu var 85% stuðningur við lagabreytingarnar.