Gísli Páll Pálsson, formaður Samtaka fyrirtækja í velferðarþjónustu, segir að ríkisstjórnin hafi vísvitandi veikt rekstrargrundvöll hjúkrunarheimili í því skyni að ná rekstri þeirra undir ríkið. Segir Gísli að þetta sé í fullkominni andstöðu við stjórnarsáttmálann frá 2017, þar sem segir að styrkja eigi rekstrargrundvöll hjúkrunarheimila.

Þetta kemur fram í harðorðri grein Gísla í Morgunblaðinu í dag. Þar segir að hjúkrunarheimilunum hafi verið gert að skera niður hjá sér ár eftir ár og nú standi enn til að skera niður. Á sama tíma hafi nær öll önnur heilbrigðisþjónusta fengið hækkun á fjárlögum. Rekstrargrundvöllur hjúkrunarheimilanna hafi hins vegar markvisst verið veiktur. Þá segir í greininni:

„Ég er þeirrar skoðunar að þetta sé með vilja gert til að svelta öldrunarheimilin svo mikið að þau gefist upp og skili rekstrinum til ríkisins. Sem er nákvæmlega það sem er að gerast. Nýlega var því lýst yfir að ríkið mun taka yfir rekstur allra öldrunarheimila Akureyrarbæjar um áramótin. Hið sama er uppi á teningnum, misjafnlega langt komið, í Vestmannaeyjum, á Höfn í Hornafirði, Fjarðabyggð og víðar. Það er ótrúlegt að Sjálfstæðisflokkurinn skuli láta sig engu varða þessa grímulausu ríkisvæðingu öldrunarþjónustunnar.“

Gísli segir að stjórnendur hjúkrunarheimilanna neyðist nú til að draga úr þjónustu til heimilismanna, fólks sem byggt hafi upp þjóðfélagið og eigi betra skilið.