Magnús Geir Þórðarson, þjóðleikhússtjóri og fyrrverandi útvarpsstjóri, tjáir sig á Facebook-síðu sinni um ráðningu Stefáns Eiríkssonar sem útvarpsstjóra. Stjórn Ríkisútvarpsins ákvað að ráða Stefán Eiríksson sem útvarpsstjóra til næstu fimm ára. Ákvörðunin var tekin samhljóða á fundi stjórnar í gærkvöldi. Hann tekur til starfa 1. mars næstkomandi. Þetta kemur fram í tilkynningu frá RÚV.
„Ég er ekki í nokkrum vafa um að Stefán Eiríksson verður farsæll útvarpsstjóri,“ segir Magnús. „Hann hefur sýnt hvers hann er megnugur á öðrum vettvangi og það verður gaman að sjá ferska sýn Stefáns á starfsemi RÚV og hvernig það þróast til framtíðar. Hann mun geta reitt sig á einstaklega öflugan starfsmannahóp og á notendur sem þykir afar vænt um sitt Ríkisútvarp.“
„Ég vona að innlent efni verði áfram í öndvegi, menningin haldi sínum mikilvæga sessi, fréttaþjónustan viðhaldi yfirburða trausti og þjónusta við ungt fólk haldi áfram að eflast. Og síðast en ekki síst vona ég að almannaþjónustan þróast í takt við síbreytilegar væntingar,“ segir Magnús einnig og bætir við að hann hlakki til þess að fylgjast með starfi Stefáns. „Ég hlakka til að fylgjast með og njóta framúrskarandi þjónustu RÚV okkar allra á komandi árum.“
