„Ummæli borgarfulltrúans Hjálmars Sveinssonar á borgarstjórnarfundi í gær um Kjalarnesið og Geldinganesið eru forkastanleg. Það er með hreinum ólíkindum að borgarfulltrúi, kjörinn fulltrúi allra borgarbúa, skuli leyfa sér að tala með þeim hætti sem hann gerði um tiltekin hverfi í borginni!“ segir Marta Guðjónsdóttir, borgarfulltrúi Sjálfstæðisflokksins, um ummæli borgarfulltrúa Samfylkingarinnar, Hjálmars Sveinssonar, um Geldingarnes og Kjalarnes. Ummælin sem hlýða má á í spilaranum hér fyrir neðan féllu í umræðu um uppfærða húsnæðisáætlun Reykjavíkurborgar í borgarráði í gær.

Marta hefur lagst gegn áætlunum um aukna íbúabyggð í Skerjafirði og bent á að borgin hafi neitað að úthluta lóðum sem hún á til á Kjalarnesi. Marta býr sjálf í Skerjafirði. Ummæli Hjálmars voru eftirfarandi:

„Það eru hins vegar ekki frábærir staðir til að búa á, held ég, sem borgarfulltrúinn Marta Guðjónsdóttir vill endilega að framtíðarkynslóðir búi á, nefnilega Kjalarnes og Geldingarnes. Geldingarnes, þar sem hvorki kindur, hestar né kýr hafa einu sinni viljað vera á beit. En þangað vill borgarfulltrúinn endilega flytja allt fólkið af því hún vill ekki fá það í næsta nágrenni við sig. “