Hildur Björnsdóttir, borgarfulltrúi Sjálfstæðisflokksins, segir ákvörðun Reykjavíkurborgar að stytta starfstíma leikskóla sé óskiljanleg aðgerð sem muni bitna mest á þeim sem minnst mega sín. Meirihluti skóla- og frístundaráðs Reykjavíkurborgar samþykkti í gær að breyta starfstíma leikskóla borgarinnar þannig að almennur starfstími verði frá kl. 07:30 til 16:30. Þetta mun ganga í gegn 1. apríl næstkomandi.
Hildur segir á Twitter að þetta muni hafa slæm áhrif á launafólk. „Í gærdag hafnaði meirihluti borgarstjórnar tillögu minni um aukna samræmingu frídaga milli skólakerfis og atvinnulífs. Á sama fundi ákvað meirihlutinn svo að skerða leikskólaþjónustu í borginni,“ segir Hildur.
Hún segir að margir hafi ekki tök á því að fara fyrr úr vinnu, svo sem þeir sem vinna vaktavinnu. „Fáir eiga þess kost að yfirgefa vinnu um klukkustund áður en hefðbundnum vinnudegi lýkur. Skert þjónusta mun eflaust koma verst niður á einstæðum foreldrum, vinnandi konum og láglaunafólki,“ segir Hildur.
Hún telur að þetta muni fæla ungar fjölskyldur frá Reykjavík í önnur sveitafélög. „Meirihlutinn sýnir takmarkaðan vilja til að mæta fjölskyldufólki. Skert leikskólaþjónusta er skotheld leið til að fæla ungar fjölskyldur frá borginni, í önnur sveitarfélög – og skotheld leið til að draga úr framgangi kvenna á vinnumarkaði. Óskiljanleg aðgerð.“
👩👩👧👦 Í gærdag hafnaði meirihluti borgarstjórnar tillögu minni um aukna samræmingu frídaga milli skólakerfis og atvinnulífs. Á sama fundi ákvað meirihlutinn svo að skerða leikskólaþjónustu í borginni. https://t.co/HLwmcFt2dB
— Hildur Björnsdóttir (@hildurbjoss) January 15, 2020