Í kjölfar frétta af leit lögreglunnar að fjölskyldunni tók fólk sig til á samfélagsmiðlum og sagði að fjölskyldan væri stödd heima hjá sér undir myllumerkinu #þaueruhjámér. Mikill fjöldi fólks hefur deilt færslum á Facebook með myllumerkinu. „Jæja, þá eru egypsku krakkarnir komnir í háttinn og við fullorðna fólkið getum slakað á,“ sagði til dæmis maður nokkur undir myllumerkinu.
Sólveig Anna Jónsdóttir, formaður Eflingar, er á meðal þeirra sem hafa tjáð sig um leit lögreglunnar að fjölskyldunni. „En það bar til um þessar mundir, á eyjunni Íslandi, auðugri og friðsælli, heimsþekktri fyrir jafnrétti, með sérstakan barnamálaráðherra, með forsætisráðherra úr flokki sem í stefnu sinni hefur þessi orð „Ísland þarf að axla ábyrgð og koma fólki í neyð til hjálpar eins og mögulegt er“, að ríkislögreglustjóri lýsti eftir 4 börnum, til að hafa upp á þeim og senda þau úr landi fyrir þær sakir einar að vera eitthvað sem kallað var „ólöglegar manneskjur“. Og öll sem heyrðu undruðust það, er fréttirnar sögðu þeim. Að lýst væri eftir ólöglegum börnum af lögreglunni,“ segir Sólveig um málið á Facebook-síðu sinni.
„Og öll sem heyrðu reyndu að ímynda sér hvernig það væri að vera eftirlýst barn, í felum, á flótta. Ólöglegt barn. Og öll sem heyrðu upplifðu skömm og sorg, og geymdu allt þetta í hjarta sér og hugleiddu það. Og öll sem heyrðu sóru þess dýran eið að reyna að gera allt sem í þeirra valdi stóð til að koma í veg fyrir að börnunum 4 yrði kastað í ruslið. Og öll sem heyrðu hugsuðu um það hvað þau gætu gert til að stoppa skömmina. Og öll sem heyrðu mundu orðin sem þau lærðu þegar þau sjálf voru lítil börn: Leyfið börnunum að koma til mín, varnið þeim eigi því að slíkra er Guðs ríki.“
