Gunnar Bragi Sveinsson, þingmaður Miðflokksins, fer hörðum orðum um stjórnarsamstarf Sjálfstæðisflokksins og VG, í grein í Morgunblaðinu í dag. Segir hann flokkinn vera methafa í því að segja eitt og gera annað.

„Merkilegt verður að teljast að Sjálfstæðisflokkurinn skuli vilja framlengja þessa sneypuför sína sem ríkisstjórnarsamstarfið við Vinstri græn hefur reynst þeim flokki,“ segir Gunnar, í samhengi við þá ákvörðun ríkisstjórnar að efna til kosninga haustið 2021 en ekki um vorið.

Gunnar segir merkilegt hvað lítið beri á milli VG og Sjálfstæðisflokksins og gerir því skóna að stefna Sjálfstæðisflokksins um gildi einstaklingsfrelsisins og viðskiptafrelsis sé orðin tóm. Gunnar skrifar:

„Munurinn á Sjálfstæðisflokknum og vinstri flokkunum er ekki merkilegur og oft erfitt að átta sig á fyrir hvaða stjórnmálaflokk ráðherrar Sjálfstæðisflokksins eru að tala enda virðist mér sem samfélagsleg sýn þessa ágæta fólks í ríkisstjórninni fari saman. Menn reyna svo sem aðsprikla og tala með gamla laginu þótt fáir taki mark á því líkt og fram kom í viðtali við varaformann fjárlaganefndar í Morgunblaðinu í gær. Magnað að lesa það að nú skuli sko tekið til á Landspítalanum og hann fái ekki aukið fjármagt og þurfi að forgangsraða! Man einhver eftir því að hafa heyrt þetta áður? Munum saman að þegar fjárlög ársins 2021 verða samþykkt að þá verður að sjálfsögðu búið að bæta Landspítalanum upp kostnaðinn vegna kórónuveirunnar en það verður einnig aukið í.“

Gunnar Bragi segir enn fremur að Ríkisútvarpið hafi fitnað í stjórnarfaðmi Sjálfstæðisflokksins um árabil, þvert á stefnu flokksins. Skattar séu ekki lækkaðir og vandi opinbera lífeyriskerfisins síaukist. Sósíalismi ráði för í heilbrigðismálum en löggæsla sé ekki efld. Þrengt sé að einkabílnum og orkustefna Evrópusambandsins innleidd. Með öðrum orðum: Sjálfstæðisflokkurinn sé flokkur sem segi eitt og geri annað.