Lilja Alfreðsdóttir, mennta – og menningarmálaráðherra, verður í sóttkví næstu tvær vikur eftir að hún greindist neikvæð í skimun hjá Íslenskri erfðagreiningu. Hún greindi frá þessu á samfélagsmiðlum í gærkvöldi:

„Kæru vinir. Vegna COVID-19 smits í nærumhverfi mínu ákvað ég að fara í skimun hjá Íslenskri erfðagreiningu. Ég fékk neikvæðar niðurstöður úr skimuninni í kvöld. Ég verð í sóttkví næstu tvær vikur. Þessi staða er mikilvæg hvatning til okkar allra að gæta áfram sóttvarna. Öll viljum við halda áfram að njóta frelsisins sem fallega íslenska sumarið hefur upp á að bjóða.“

Fréttablaðið segist hafa heimildir fyrir því að eiginmaður Lilju, Magnús Óskar Hafsteinsson, hagfræðingur í fjármálaráðuneytinu, sé smitaður af Covid-19 sjúkdómnum.

Lilja var í þinginu í gær og því er viðbúið að fleiri ráðherrar, þingmenn og starfsfólk Alþingis þurfi að fara í sóttkví einnig.

Morgunblaðið hefur eftir Róberti Marshall, upplýsingafulltrúa ríkisstjórnarinnar, að ekki séu fleiri ráðherrar í sóttkví, sem hann viti af.