Róbert Spanó var í dag kjörinn forseti Mannréttindadómstóls Evrópu, en hann var kjörinn varaforseti fyrir ári síðan. Hann tekur við embættinu þann 18. maí af Linos-Alexandre Sicilianos frá Grikklandi.
Róbert hefur verið dómari við réttinn frá árinu 2013 og var kjörinn forseti sinnar dómdeildar í maí 2017, eftir þrjú og hálft ár við réttinn.
Hann var meðal dómara MDE í Landsréttarmálinu sem taldi að Sigríður Á. Andersen, þáverandi dómsmálaráðherra hefði gerst brotleg við 6. grein mannréttindasáttmála Evrópu, sem fjallar um rétt til réttlátrar málsmeðferðar fyrir dómi.
Alls eiga 47 dómarar frá aðildarríkjum Evrópuráðsins sæti í Mannréttindadómstólnum.
Mannréttindadómstóll Evrópu var stofnaður árið 1959 á grundvelli Mannréttindasáttmála Evrópu og tryggir að aðildarríki Evrópuráðsins virði þau réttindi sem kveðið er á um í sáttmálanum. Dómstóllinn hefur aðsetur í Strassborg í Frakklandi.
Borgarar í aðildarríkjum Evrópuráðsins geta leitað til mannréttindadómstólsins telji þeir að stjórnvöld hafi beitt þá órétti. Dómstóllinn rannsakar kærur um brot sem honum berast frá einstaklingum eða ríkjum og ef hann telur að ríki hafi brotið gegn ákvæðum sáttmálans þá dæmir hann í málinu.
Dómstóllinn hefur kveðið upp rúmlega 10.000 úrskurði um mannréttindabrot og ber aðildarríkjum Evrópuráðsins skylda til að fara eftir úrskurðum hans.
