Sem kunnugt er þá hefur Sólveig Anna Jónsdóttir, formaður Eflingar, sett borgarstjóra tvö skilyrði fyrir því að hitta hann á fundi um kjaradeilu Eflingar við Reykjavíkurborg.
Annarsvegar að birta glærur frá samningafundi þann 19. febrúar, til að ganga úr skugga um að tilboðið sé hið sama og Dagur kynnti í Kastljósþætti sama dag og hins vegar að mæta Sólveigu, eða fulltrúa Eflingar, í kappræðum í útvarpi eða sjónvarpi.
Ekki eru allir sáttir við þessar aðferðir Sólveigar.
Þorsteinn Víglundsson, þingmaður Viðreisnar, tekur upp hanskann fyrir borgarstjóra í færslu á Facebook í dag, en Viðreisn er í meirihlutasamstarfi við Samfylkinguna í borginni. Hann segir skilyrði Sólveigar til marks um að eitthvað annað búi að baki en að leysa deiluna:
„Erfiðar kjaradeilur eru aldrei leystar í fjölmiðlum og yfirleitt er það svo að samningar takast sjaldnast fyrr en slíkar skeytasendingar hætta og aðilar setjast að samningaviðræðum. Þegar kappræður í fjölmiðlum eru orðnar að skilyrði fyrir viðræðum um lausn kjaradeilu þá býr eitthvað annað að baki en hefðbundin deila um launakjör fólks,“
segir Þorsteinn án þess að útskýra nánar hvað hann eigi við.
Efling hefur áður verið sökuð um að „plægja akurinn“ fyrir Sósíalistaflokk Íslands, sem hyggst bjóða fram til Alþingiskosninga á næsta ári.
Björn Bjarnason, fyrrverandi dómsmálaráðherra, hefur verið gagnrýninn á nýja forystu Eflingar frá því Sólveig Anna tók við. Hann segir þetta útspil hennar aðeins gert henni sjálfri til framdráttar og hafi ekkert með kajradeiluna að gera:
„Hér hefur hvað eftir annað verið haldið fram að það sé Sólveigu Önnu um megn að semja fyrir hönd umbjóðenda sinna um kaup og kjör. Hér fæst staðfesting á réttmæti þessara orða. Til að hún geti rætt við borgarstjóra þarf hann fara að einhverju sem er hreinn persónulegur fyrirsláttur hennar og hefur ekkert með kjaradeiluna að gera. Að þannig skuli haldið á verkfallsvopninu sýnir að Sólveig Anna lítur bara á það sem tæki sér til framdráttar.“
Margrét Vala Gylfadóttir, formaður foreldrafélags leikskólans Hlíðar, segir sandkassaleik þeirra Sólveigar og Dags bitna mest á börnunum í samtali við RÚV:
„Það er óásættanlegt að þetta virðist fara fram á Facebook-síðum aðila en ekki við samningaborðið. Fólk þarf að fara að huga að því að setjast við borðið og tala saman eins og fullorðið fólk en ekki eins og leikskólakrakkar í sandkassanum,“
segir Margrét, en verkfallið hefurstaðið yfir í 16 daga:
„Það eru börnin sem þetta fyrst og fremst bitnar á og þetta er virðingarleysi gagnvart þeim og foreldrunum. Þetta er náttúrulega ekkert orðið grín í dag, fólk er farið að taka launalaust leyfi og fara að ganga á sumarleyfið sitt, sem mun vanda erfiðleikum þegar leikskólarnir loka.“
