Regnboginn sem er var málaður neðst á Skólavörðustíginn hefur algjörlega slegið í gegn. Vinur minn sem stundar veitingasölu við götuna segir mér að viðskiptin hjá sér hafi aukist við tilkomu hans. Nú er það ekki bara Hallgrímskirkja við enda Skólavörðustígsins sem dregur að heldur vísar regnboginn leiðina upp götuna – dregur þangað vegfarendur.
Stundum þarf ekki nema svona smá hugkvæmni til að búa til skemmtilegt borgarumhverfi. Þarf ekki alltaf að vera stórt eða dýrt.
Regnboginn er orðinn einn vinsælasti vettvangur fyrir myndatökur í bænum. Það er orðin tíska að fólk setjist á götuna til að taka mynd af sér í miðjum regnboganum.
Þessar myndir voru teknar í blíðviðri snemma í gærkvöldi. En það er fleira skrítið og skemmtilegt að sjá í bænum. Fyrir framan Hallgrímskirkju voru þessi kínversku pör að láta mynda sig vegna giftingar. Maður reyndar veltir fyrir sér hvernig þetta fer allt fram. Varla giftast þau að lúterskum sið inni í kirkjunni? Er þetta frekar til málamynda?
Á eyjunni Santorini í Grikklandi er þekkt að fjöldi para frá Kína láta gefa sig saman í hóp, það er orðinn stórbisness.