Það setur að manni óhug að vera staddur í Bandaríkjunum þar sem eru framin tvenn fjöldamorð á einum sólarhring, annað í Texas og hitt í Ohio. Í þeirri fyrri deyja 20 saklausir borgarar, í þeirri síðari 9 manns. Þetta er skelfileg villa í bandarísku samfélagi sem virðist ómögulegt að leiðrétta.
Í báðum tilvikum eru ódæðismennirnir ungir karlmenn, rétt rúmlega tvítugir. Í samfélaginu sem þeir búa í hafa þeir nær ótakmarkaðan aðgang að skotvopnum – árásarrifflum sem eru hannaðir til að drepa sem flesta á sem stystum tíma.
Vopnum sem eiga ekkert erindi í hendur almennings.
Það er talað um hatursglæpi í þessu sambandi – en menn skirrast við að nota orðið hryðjuverk? Hví þá?
Þessi auglýsing hangir á húsi hérna rétt hjá í miðborg Boston. Ég tók mynd af henni í fyrradag, áður en fréttir bárust af skotárásunum tveimur.