Greint var frá því í janúar að svokallaðar meðalhraðamyndavélar hefðu verið settar upp í Norðfjarðargöngum og á Grindavíkurvegi.

Meðalhraðamyndavélar eru frábrugðnar hefðbundnum hraðamyndavélum, þar sem þær mæla aðeins hraða bifreiðar á staðsetningu A og B og reikna síðan út hvort viðkomandi bíll hafi haldið sig innan löglegs hraða á milli þeirra punkta. Ef ekki, fær viðkomandi ökumaður sekt.

Á vef Grindavíkurbæjar er greint frá því að enn sé verið að gera prófanir á vélunum, en ökumenn sem þar fara um sjá gjarnan blossa koma úr þeim. Þeir þurfa hinsvegar ekki að hafa áhyggjur af sektum, því samkvæmt upplýsingum frá Vegagerðinni er ekki heimilt að nota þær ennþá.

Fyrst þarf Alþingi að samþykkja frumvarp til laga um persónuupplýsingar í löggæslutilgangi, en eins og kunnugt er ganga hlutirnir býsna hægt fyrir sig þessa dagana á þinginu, þar sem Miðflokkurinn er sagður halda öllum málum í gíslingu með málþófi, ekki bara þriðja orkupakkanum. Óvíst er því hvort frumvarpið nái í gegn fyrir sumarfrí.

Þeir sem stunda hraðakstur geta því andað léttar, þar sem einnig er beðið eftir endanlegum vottunarpappírum frá framleiðanda vélanna.