Í umfjöllun Kveiks og Stundarinnar í nóvember kom fram að Katla Seafood, nú Mermaria Seafood, hefði greitt 16,5 milljónir til félagsins ERF 1980 í gegnum leigusamning og hafi þetta verið mútugreiðslur. Peningarnir sem fóru til ERF 1980 fóru í vasa Jems Hatuikulipi, stjórnanda Fishcor, og Sacky Shanghala, fyrrum dómsmálaráðherra Namibíu. Samherji segist ekki hafa vitað af þessum greiðslum.

Fréttablaðið skýrir frá þessu í dag. Haft er eftir Ingólfi Péturssyni, fyrrverandi fjármálastjóra Samherja í Namibíu, að hann hafi aldrei skýrt stjórnendum Samherja á Íslandi frá greiðslum til Sacky Shanghala. Ingólfur segir ólíklegt að stjórnendur Samherja hér á landi hafi vitað um tilvist ERF 1980.

Shanghala og Hatukulipi voru báðir handteknir í Namibíu í lok nóvember vegna málsins.

Enginn þeirra starfsmanna Samherja, sem Fréttablaðið ræddi við, vildi koma fram undir nafni í tengslum við umfjöllun um mútugreiðslur í gegnum félagið ERF 1980. Blaðið segir að það sé vegna fyrirmæla norsku lögmannsstofunnar Wikborg Rein sem rannsakar málið nú fyrir hönd Samherja.

Í bréfi sem fyrirtækið sendi Fréttablaðinu segir að þessar greiðslur hafi alfarið verið á vegum Jóhannesar Stefánssonar, uppljóstrara og fyrrverandi stjórnanda Namibíufélaga Samherja. Með bréfinu fylgdu tölvupóstar frá 2015 en þá er ekki að finna í gagnabanka WikiLeaks. Segir Samherji það styrkja málflutning fyrirtækisins.