Landlæknisembættið leggst gegn frumvarpi þriggja sjálfstæðismanna um breytingu á lyfjalögum sem heimilar sölu lausasölulyfja í verslunum. Morgunblaðið greinir frá.

Frumvarpið hefur áður verið lagt fram, en er nú lagt fram óbreytt af Unni Bráð Konráðsdóttur, Óla Birni Kárasyni og Bryndísi Haraldsdóttur, en þau vilja tryggja aðgengi allra landsmanna að nauðsynlegum lyfjum þar sem Ísland standi mörgum Evrópuríkjum að baki í þeim málaflokki. Þá er nefnt í greinargerð að fyrirkomulagið hafi ekki leitt til ofnotkunar lyfja, haft slæm áhrif á lýðheilsu eða fjölgað eitrunartilfellum. Þá er tekið fram að breytingin auki samkeppni og lækki verð til neytenda.

Landlæknisembættið leggst gegn frumvarpinu með þeim rökum að lyf eigi ekki að vera almenn verslunarvara:

„Að mati landlæknis er hér um nauðsynlegt öryggisatriði að ræða fyrir þá sem þurfa á lyfjum að halda. Enn fremur vill embættið vekja athygli á að Íslendingar nota meira af ákveðnum lyfjum, sérstaklega tauga- og geðlyfjum, en nágrannaþjóðirnar og því telur embættið að almennt þurfi að auka aga og virðingu fyrir lyfjum og vanda alla umgengni um þau og ráðstöfun.“

Þá er sagt að vandséð yrði hvernig sú mikla þekking og reynsla sem krafist er í apótekum geti verið til staðar í almennum verslunum.