Merkilegt er að sjá þessa skýringamynd af kosningaúrslitum í Póllandi í gær. Myndin er af vefsíðunni Oko.Press. Á henni má sjá að landið er í raun klofið í tvennt – menn þykjast meira að segja greina að línan liggi nánast eftir landamærum eins og þau voru á fyrri hluta 20. aldar.
Hinn þjóðernissinnaði Laga- og regluflokkur, flokkur Jarosławs Kaczyński, sem er ríkjandi stjórnmálaafl í landinu og sigraði í kosningunum, hefur mest fylgi í austurhéruðum landsins. Hann er merktur með bláa litnum. Inn í bláa litinn koma gular skellur sem manni sýnist að séu borgirnar Varsjá og Lodz, þar líkt og í fleiri borgum hefur stjórnarandstaðan meirihluta.
Guli liturinn táknar Borgarabandalagið, það er sambræðingur úr stjórnarandstöðuöflum sem koma úr ýmsum áttum en eiga það sameiginlegt að vera evrópusinnuð. Græni liturinn táknar Lýðflokkinn, sem sækir mest sitt fylgi til bænda, en rauði liturinn táknar SLD, sósíaldemókrataflokk sem var við stjórnvölinn um tíma eftir hrun kommúnismans en hrundi síðan.