Halldóra Mogensen, þingmaður Pírata, segir ábyrgð þerna sem eru í verkfalli í dag, ansi mikla ef vinnustöðvun þeirra hafi jafn mikil áhrif og raun ber vitni og ógni stöðugleikanum í þjóðfélaginu. Segir hún að samkvæmt því ættu þær að fá laun til samræmis við þá ábyrgð:

„Í dag hefja hótelþernur verkfall og fjölmiðlar loga með fréttum af skaðsemi verkfallsins á afkomu ferðaiðnaðarins. Eins og öll ábyrgðin á stöðugleikanum falli á herðar láglaunakvenna frekar en á herðar stjórnvalda. Ríkisstjórnin hefði getað hlustað á verkalýðshreyfinguna og lagt til alvöru tillögur til úrbóta en kaus að gera það ekki. En svo er spurning hvernig við metum ýmis störf í samfélaginu. Er það ekki einmitt vísbending um mikilvægi hótelþerna þegar verkfall þeirra hefur jafn mikil áhrif á starfsemi hótela og raun ber vitni? Ættu launin ekki að vera í samræmi við þá erfiðisvinnu sem þessar konur vinna?“

Þá varpar Halldóra fram athyglisverðri vangaveltu um hvað myndi gerast ef forstjórar, sem þiggja gjarnan býsna há laun, færu í verkfall:

„Það væri áhugavert að sjá hvort sólahringsverkfall hótelforstjóra eða nokkurra annarra forstjóra myndi setja samfélagið á hliðina. Ég efast um að nokkur myndi taka eftir því.“