Haukur Örn Birgisson, forseti Golfsambands Íslands og pistlahöfundur á Fréttablaðinu, segir að tjáningarfrelsið eigi undir högg að sækja og sé dottið úr tísku. Fáránlegar kröfur um að setja hömlur á ýmiss konar ummæli heyrist daglega. Þetta kemur fram í Bakþönkum Hauks í Fréttablaðinu. Haukur segir að kröfurnar um hömlur á tjáningarfrelsið komi ætíð frá fólki með góðan vilja sem vilji ekki að fólk særist vegna ummæla annarra. Málið sé hins vegar ekki svo einfalt. Haukur skrifar:

„Í bandarískum háskólum (reyndar einnig HR) keppast viðkvæmir nemendur við að fá kennara með vondar skoðanir rekna frá skólunum. Umdeildir fyrirlesarar eru stöðvaðir við upphaf málþinga. Skemmtikraftar undirrita yfirlýsingar um að þeir muni ekki segja brandara sem gætu móðgað tiltekna áhorfendur. Allt í nafni umburðarlyndis og frjálslyndis. Það gleymist að það er ekkert frjálslynt við að banna brandara, þótt flestum finnist þeir ekki fyndir. Það er ekki til hlutlægur mælikvarði á húmor.“

Haukur bendir á að ókurteisi og dónaskapur séu verðmiði á frjálsu samfélagi. Fólk verði að fá að hafa vondar skoðanir og slæmar hugmyndir hverfi ekki við að þær séu bannaðar:

„Það verður alltaf til ókurteist, vont og ófyndið fólk. Einnig fólk með fráleitar skoðanir. Það má samt ekki banna fólki að segja ljóta hluti. Engar af verstu hugmyndum mannkynssögunnar hurfu úr umræðunni, vegna þess að þær voru bannaðar. Þvert á móti. Hvort sem fólk er heimskt, vont, dónalegt eða með vondan húmor – þá verður það að fá að tjá sig. Jafnvel þótt aðrir kunni að særast vegna þeirra.“