Landsréttur staðfesti í gær niðurstöðu Héraðsdóms Reykjavíkur í máli miðflokksmannanna fjögurra gegn Báru Halldórsdóttur, fyrir leyniupptökurnar í Klaustursmálinu. Stundin greindi frá.
Kærendurnir, þeir Sigmundur Davíð Gunnlaugsson, Gunnar Bragi Sveinsson, Bergþór Ólason og Anna Kolbrún Árnadóttir, voru dæmd til að greiða Báru alls 300 þúsund krónur í málskostnað, en þau höfðu krafist gagnaöflunar og vitnaleiðsla fyrir héraðsdómi í desember, sem var vísað frá. Þá var áfrýjað til Landsréttar, sem staðfesti niðurstöðu Héraðsdóms um höfnun krafna þeirra.
Ekki liggur fyrir hvert framhaldið verður, hvort fjórmenningarnir hyggjast leggja fram kæru á Báru Halldórsdóttur, en Sigmundur Davíð og Gunnar Bragi mættu ekki á fund stjórnskipunar- og eftirlitsnefndar í gær, þegar fjallað var um skipan sendiherra, líkt og fram kom í Klaustursupptökunum.
