Eyþór Arnalds, borgarstjóraefni Sjálfstæðisflokksins, skrifar grein í nýjasta hefti Þjóðmála, hvar hann fer um víðan völl í gagnrýni sinni á núverandi borgarstjórnarmeirihluta og fer yfir það sem honum finnst að betur megi fara.

Eyþór hefur áður nefnt tilhneigingu borgarstjórnar til að skipa starfshópa. Eyþór ítrekar að Dagur B. Eggertsson borgarstjóri hafi skipað starfshóp þriðja hvern dag sem hann hefur verið í embætti, eða alls 351 starfshóp.

Hann bendir síðan á að í febrúar hafi enn einn starfshópurinn verið skipaður, sem sé starfshópur um „miðlæga stefnumótun.“

Eyþór birtir síðan málsgrein úr erindisbréfi starfshópsins, sem á að útskýra hlutverk hans, en kemur síðan með nokkuð hnyttna athugasemd, sem hittir naglann á höfuðið:

„Hlutverk starfshópsins er að vinna að umbótum og samræmdri framkvæmd í stefnumótun og stefnuframkvæmd, einkum í miðlægri stjórnsýslu og miðlægri stefnumótun. Að fá bætta yfirsýn yfir þær miðlægu stefnur og stefnumarkandi skjöl sem eru fyrir hendi og tengingu við undirstefnur og áætlanir málaflokka. Jafnframt fá yfirsýn yfir þær aðferðir sem notaðar eru við miðlæga stefnumótun. Á grundvelli greiningarvinnu setji starfshópur fram viðmið um bestu framkvæmd við stefnumótun.“

 Monty Python hefði ekki getað orðað þetta betur.“

Varla er um það deilt, að mikillar einbeitingar er krafist af lesenda þessarar málsgreinar, eigi hún að skiljast.