Hælisleitandinn Reber Abdi Muhamed var á aðalfundi Pírata í morgun kjörinn áheyrnarfulltrúi í framkvæmdaráði Pírata. Framkvæmdaráð annast almenna stjórn og rekstur félagsins. Þetta kemur fram í tilkynningu frá Pírötum, hvers aðalfundur er haldinn á Selfossi í dag.

Átján gáfu kost á sér í kjör framkvæmdarráð Pírata. Tveir voru slembivaldir inn í framkvæmdaráð Pírata, þeir Pétur Óli Þorvaldsson, sem situr í tvö ár  og Steinar Guðlaugsson sem situr í eitt ár.

Í slembivali koma allir aðalfundargestir til greina og fyrst var slembivalinn inn Reber Abdi Muhamed. Reber er hælisleitandi frá Kúrdistan og getur því lögum samkvæmt ekki tekið stöðu í framkvæmdaráði. Hann hefur verið virkur í starfi Pírata síðustu mánuði og lýstu margir fundargestir yfir óánægju með að Reber gæti ekki tekið sæti. Sú tillaga var þá borin undir fundinn að gera Reber að áheyrnarfulltrúa framkvæmdaráðs og var tillagan samþykkt með rífandi lófataki. Reber kom til Íslands í vor ásamt bróður sínum, Shivan Abdi Mohammed, sem einnig hefur sótt um hæli hér á landi.

Enn stendur yfir kosning í framkvæmdaráð en henni lýkur klukkan 17.30 í dag. Pétur Óli var í framboði en dettur út af framboðslistanum þar sem hann var slembivalinn. Eftir standa sextán í framboði en fjórir verða kjörnir.

Einnig stendur yfir kjör í úrskurðarnefnd og kjör skoðunarmanna reikninga.