„Þetta er mjög frjálslynd ríkisstjórn, með jafnlaunavottuninni erum við að tryggja að kynin fái sömu laun. Það er einmitt mjög frjálslynt. Við viljum að það sé ekki hægt að svindla á fólki, það á ekki að svindla á kerfinu og ekki svindla á konum, það á ekki að svindla á skattkerfinu, við viljum að við öll borgum lægri skatta. Við erum að neyða svarta hagkerfið, við erum að neyða glæponana til að þeir verði ekki faldir lengur.“
Þetta sagði Benedikt Jóhannesson fjármálaráðherra og formaður Viðreisnar í útvarpsþættinum Harmageddon í morgun. Benedikt hefur verið harðlega gagnrýndur undanfarna viku eftir að hann sagði hinu svarta hagkerfi á Íslandi stríð á hendur og loguðu athugasemdakerfi vefmiðla í gær þegar greint var frá því að ráðherra hygðist stofna nefnd í vikunni sem mun hafa það hlutverk að skoða aðstæður og kanna hvaða leiðir eru færar í því að draga úr notkun reiðufjár hér á landi. Var Benedikt í morgun spurður hvort þessi stefna, sem og lögfesting jafnlaunavottunar fyrirtækja og bann á sterum, væri í samræmi við frjálslynda stefnu ríkisstjórnarinnar. Hann segir svo vera, með því að setja bann við launagreiðslum í reiðufé þá sé verið að vernda vinnandi fólk:
Það er ekki frjálslyndi þar sem er alltaf verið að vernda þann sem að svindlar og stelur. Það er ekkert svínað á borgararéttindum, vissulega er þetta þannig að það er fylgst mjög mikið með okkur ef menn vilja,
sagði Benedikt. Varðandi jafnlaunavottunina segir Benedikt hana ekki koma í veg fyrir að betri starfskraftar geti fengið launahækkun, það sé mikið sem þurfi að taka tillit til en þegar það sé gert eigi ekki að vera neinn óútskýrður launamunur á milli kynjanna.
Breyting kjördæma myndi jafna atkvæðisréttinn
Aðspurður um hvaða frjálslynda mál hann sjálfur hlakkar til að koma á koppinn sagði Benedikt:
„Það sem ég hefði áhuga á er að jafna atkvæðisréttinn.“
Það mál sé í stjórnarsáttmálanum, orðað þannig að draga eigi úr misvægi atkvæða. Þetta væri tengt breytingum á stjórnarskránni, en það þýddi samt ekki að sameina ætti landið í eitt kjördæmi til að tryggja að sjónarmið alls landsins kæmu fram:
Það eru til aðferðir til að jafna það bara með því að breyta til dæmis kjördæmamörkum. Ég hef sagt það, af hverju má ekki færa kjördæmamörkin yfir Hvalfjörðinn þó það séu einhver sýslumörk þar. Það hefur verið gert erlendis, það er alltaf verið að breyta kjördæmunum.
