Theresa May forsætisráðherra felldi tár þegar hún sá hvert stefndi í bresku þingkosningunum í sumar þar sem Íhaldsflokkurinn missti meirihluta sinn á þingi. Í viðtali við BBC í morgun sagði May að það hefði tekið hana nokkrar mínútur að átta sig á hvað væri að gerast. Aðspurð hvort hún hefði grátið sagði May:

Já, lítið tár, á þeirri stundu.

Fram að útgönguspánum hafði henni verið sagt að Íhaldsflokkurinn væri með tryggan meirihluta og því komu niðurstöðurnar mjög á óvart:

Þegar ég heyrði um útgönguspána. Til að segja eins og er, þá horfi ég aldrei á útgönguspárnar sjálf – það er bara hjátrú. Maðurinn minn horfði á útgönguspána og kom til mín og sagði mér. Ég var í áfalli yfir niðurstöðunum. Það tók smá stund að átta sig á hvað hefði gerst. Hann faðmaði mig, svo hringdi ég í höfuðstöðvar flokksins til að komast að hvað hefði farið úrskeiðis.

Bresku blöðin Independent og Mirror hafa eftir sjónarvottum að dauðaþögn hafi ríkt í höfuðstöðvum Íhaldsflokksins þegar May hafi mætt á staðinn um kvöldið. Mun einn starfsmaður flokksins hafa ælt þegar hann sá niðurstöðurnar. Kosningabarátta Íhaldsflokksins hefur verið harðlega gagnrýnd, en þegar May boðaði til kosninganna í apríl þá var útlit fyrir að hún myndi styrkja stöðu sína, en þess í stað þurfti Íhaldsflokkurinn að leita á náðir DUP-flokksins til að verja ríkisstjórn May falli. Í viðtalinu við May í morgun sagði hún að hún tæki fulla ábyrgð á niðurstöðunni, sem stafaði af röngum skilaboðum sem flokkurinn hefði sent frá sér í kosningabaráttunni:

Þegar niðurstöðurnar lágu fyrir voru margir í flokknum mjög hissa og í áfalli. Við sáum þetta ekki fyrir og ég held að það sama gildi um Verkamannaflokkinn,

sagði May. Aðspurð um hvort hún sjái eftir að hafa boðað til kosninganna þremur árum á undan áætlun, sagðist May vera ánægð með að hafa bætt fylgi flokksins, þó svo að hafa tapað þingsætum:

Ef þú rýnir í niðurstöðurnar þá náðum við þingsætum sem Íhaldsflokkurinn hefur aldrei náð áður, til dæmis Mansfield.