Einn er látinn og 10 eru slasaðir eftir að hryðjuverkaárás í norðurhluta London. Karlmaður ók sendibíl á gangandi vegfarendur næri mosku í Finsbury Park. Hinn látni og allir hinir slösuðu eru múslimar og segja vitni að ökumaður sendibílsins, sem var einn í bílnum, hafi sagt að hann vildi „drepa alla múslima“.

Átta voru fluttir á spítala í kjölfar árásarinnar, þar af nokkrir alvarlega slasaðir, sem átti sér stað stuttu eftir miðnætti að breskum tíma. Maðurinn sem talið er að hafi ekið bílnum var handsamaður af vegfarendum sem héldu honum uns lögregla mætti á staðinn. Í fyrstu var óttast að maðurinn væri vopnaður hnífi en svo reyndist ekki vera. Hann er 48 ára gamall.

Abdulrahman Saleh Alamoudi varð vitni að árásinni og sagði í samtali við breska ríkisútvarpið BBC að hann hefði verið í hópi fólks sem kom eldri manni til aðstoðar á gangstétt sem hafði fallið í jörðina. Í kjölfarið hafi sendibílinn tekið beygju og keyrt á hópinn.

Þetta staðfesti yfirmaður hjá lögreglunni í London, Neil Basu. Að sögn hans hófst árásin þegar sendibíl var ekið á mann sem vegfarendur voru að veita fyrstu hjálp.

Því miður lést maðurinn. Það er of snemmt að segja til um það hvort að það hafi verið vegna árásarinnar,

sagði Basu í samtali við BBC.